THLEMNA LEH FIAHNA

"Thlêmna tuar hrâm hrâmtu chu a eng a thâwl e, fiaha a awm hnuin nunna lallukhum, Lalpan Amah hmangaihtute hnêna a tiam chu a hmu dâwn si a."
Jacoba 1:12

  Thlêmna hi kan hriat chian a ṭha khawp mai. Thlêmna tuar hrâm hrâm tûr chuan a thlêmtu nên an in zâwm lo a ni. Sual thlêma kan awm chuan suala mi kan ni lo. Suala awmsa chu thlêm hranpa a ngai lo. A awmna kha sual a ni sa a ni.

    Isua chuan sual kan nihna aṭangin min chhanchhuak a, sual lakah min la hrang a ni. Kan awmna tûr leh kan nihna atân tho leh Krista nun chu min buatsaihsak. Krista chuan khawvêl mi kan nihna ata min ti hrang tawh avângin, khawvêl mi kan ni tawh lo. Kristaah chuan Pathian a mi kan ni tawh zâwk a ni.

     Sual chuan nasa takin kan nihna hlui khawvêl mi kan nihna te, tisa mi kan nihna te, keimah kan intihna hmangtein min rawn thlêm leh thin. Thiam takin kan panna zawnah min rawn bei ṭhîn a ni. Krista chuan sual lakah min tih hran tawh avângin sual Setana chuan a rem dân ang apiangin min thlêm thin a ni.

       Thlêmna rêng rêng Pathian aṭangin a ni lova, Pathian pawh sual thlêm rual a ni hek lo, chuvângin thlêmna chu keimahni lam aṭangin a lo chhuak ṭhîn a ni.

         "Tu man thlêmna an tawh laiin 'Pathian thlêm ka ni' ti suh se; Pathian chu sual thlêm rual a ni lo, Amah pawhin tu mah a thlêm ngai lo. Mitin mahni châknaa hruai bo leh hipa an awm chuan thlêmna an tâwk a ni zâwk e. Tin, châkna chuan no a pai a, sual a hring ṭhîn a, tin, sual chuan a lo puitlinin thihna a hring ṭhîn."

Jacoba 1:13-15

     Thlêmna hrang hrang kan tâwk ṭhîn. Chu thlêmna tam tak chu keimahni duh zâwng leh hlimna zâwngten sual hian min thlêm thiam êm êm a ni. Heng thlêmnate hi kan tawh tlangpui an ni.

     Thenkhat erawh keimahni lama duhna lam ni lovin, pawn lam aṭangin min thlêm fo ṭhîn bawk. Isua chu engkimah min hruaitu a ni a, kan chatuan nunna pawh a ni. Atâna siam leh din kan nih lai hian atâna nun hmang thei lo tûrin chhûngte aṭang leh kan ei zawnna emaw, rawngbawlna aṭang ngei maiah pawh nise, kan hun tawn dân a zirin sual Setana hian thiam takin min rawn  thlêm ṭhîn a, a duh dâna awm tûrin ṭan a la nasa êm êm a ni.

  Isuaa kan awmna hmun aṭanga min lak hran hi a tum ber a ni. A tira hote angin a lang a,  chu hote anga kan ngai chuan rei loteah thihna ruam min thlen theitu a ni thin.  Chuvângin Krista nunna chuan chûng sualna hrang hrang chu min hnehsak tawh a, a lo chhuahna sual nên. Chûng Sualna hrang rang hmang chuan fiahna kan tâwk fo ang. Chu fiahna chu Krista-in kan paltlang ṭhîn tûr a ni. 

      2 Korinth 13:5 Rinnaah chuan in awm emaw, nangmahni ngei inchhin thin ula; nangmahni ngei in fiah thin rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni? Duh loh in nih nghal loh chuan.

     A  thu a chhiartuteah Lalpan malsawm rawh se. Amen.

INNGHAHNA DIK LAL ISUA

    Khawvêlah hian innghahna tûr zawngin kan nun kan hmang ṭhîn. Chu innghahna tûr atâna kan hman tum teah hlawhtlinna kan hmu em? Tih erawh kan in chhût chian a pawimawh khawp mai.
  Nu leh paah innghah tûmte, chhûngkua hausaknaa innghah tumte, mihausaa innghat te, mahni thiamna leh theihnaa innghah tumte, mi liana innghah tûmin ṭan kan lo la a ni mai thei.
  Mahse, Krista tel lova chûng zawng zawnga innghah kan tumna chu chatuan daih engmah a awm si lo. Rei lotea ral leh mai tûr a ni tih hi kan chian a va ṭul tak em!
   Jeremia  17:5-6 LALPA chuan heti hian a ti: Mihring rinchhana, mihring bân chakna ring a, LALPA hawisanna thinlung neitu chu Ânchhe dawngin awm rawh se. Thlalêra hnim buk ro rire ang an ni a, thil tha chhuak tûr rêng a hmu lo vang. Thlalêr ram ro, chi leilung, tuma luah lohvah chuan a chêng zâwk ang.
   Krista chauh rinchhantu leh innghah nâna hmang tlattu te erawh hlawhtlinna a hmu thin. Krista rinchhan tlattuten eng pawh lo thleng se, Krista avâng chuan an lo hmachhawn ngam thin a, eng harsatna pawh lo thleng se Kristaa innghat tlattu a nih avângin a hlau ngai lo. Mi dang tân malsawmna a ni ṭhîn a, miten damna an lo chang ṭhîn a ni.
    Jeremia  17:7-8 LALPA ringtu, a rinchhan LALPA ni erawh chu a eng a thâwl e. Tui kianga thingphun, lui kama zungkai, Khaw lum lo thleng pawh hlau lo, A hnahte hring reng si, Khawkhen kum pawisa lo. Rah chhuah ṭhulh chuang si lo ang hi a ni ang.
  Kriata chauh hi innghahna dik leh tluantling a ni tih hi i ringhlel vang u. Amen.
      Lalpa malsawm rawh se.

VAN INDONA

Dr. Sangthankima

   Engkim Ama duh dâna siamtu awmna,  Vân khawpuiah chuan bawlhhlawh rêng rêng a awm ngai lo, chu hmun nuamah chuan engtin nge indona a lo awm theih mai le? A chhanna Bible-ah kan en ho dâwn a, vawiin atân kan nuna a pawimawhna changfiah ngei tûrin kan zîrho dâwn a ni. Keini 'Pathian arsi' te hian eng ang dinhmun pawimawh nge Pathian thinlungah kan luah tih pawh kan hrethiam nghal thei ang.

   Vân khawpuiah chuan Pathian in vântirhkoh tam tak a nei a, chung zingah chuan Lucifer-a, Mikaela leh Gabriela-te hi vântirhkoh chungnung an ni. Gabriela hian Pathian hnên aṭanga thuchhuak chu zawlnei te hnênah puang chhuakin Lal Isua lo pian dâwnah pawh a phusa ber a nih kha. Mikaela hi sipai hotu kan ti thei ang chu, vân indonaah pawh vântirhkohte hotu a ni a, Lucifer-a erawh 'Vanparh zinglam fapa' tiha vuah, ropuina leh mawina tinrênga thuam; vântirhkoh zawng zawng zînga chungnung ber a ni thung.

  He indona hi zir hmaa kan hriat tûr pawimawh tak 'Awm tawh, awm mêk leh lo la awm tûr' chungchang leh 'thil awm mêk te hi lo awm tawh an ni a, lo la awm tûr pawh lo awm tawh bawk an nih thu ( Thuhriltu 3:15)' hi hre lawk ila. Tin, Lal Isua, Alpha leh Omega-ah engkim a infawkkhawm vêk a ni tih hi ring thlap bawk ang aw.

  Ezekiela bung 28 ah Tura lal tlawm tûr thu kan hmuh hi vânparh, zînglam fapa chungchang sawina a ni a, hemi leh Isaia bung 14 thu a Setana vân ata paihthlak a nihna chhan kan hmuhte aṭang hian vân indona i lo zir ho teh ang u. Vântîrhkoh chungnung ber ni tûra siam, mawina leh ropuina tin rênga thuam chuan a mawina avânga chapoin, a thuneihna pawh Pathian tluka dahsân a lo tum ta tlat mai. Tin, Pathian arsite chunga rorèltu nih tumin a lal thutphah chu chawisàn a duh ta. He zinglam fapa ' Lucifer' nun hi pawngnekna in a luahkhat ta tih kan hmu a ni. Pathian remruatna chu tih danglam a, Pathian anga awm a lo duh ta a ni. Sual rêng rêng awm ngai lohna khawpui chu tihbawlhhlawh a ni ta a ni chu!!

  Chapona leh ropui duhna vâng hian Pathian kan lo do ve reng lo maw? Ngun takin mahni in enfiah tel zêl chungin aw. Vân khawpuia sakawlh, amah siamtu leh dintu pawh do tu Dân bawhchhiatna thurûk chuan tunah pawh a thawk mêk a ni si a. (Thessolonika 2:7)

  Thupuan bung 12 kan en chuan vân indona lo awm chungchang kan hmu a, hei hi 'Awmtawha' aṭangin han en hmasa ila. Hmeichhia, 'Nî' a inthuam hian a entîr chu Pathian a ni. Dragon hian a entir chu Setana, Varpharh  zinglam fapa, Lucifer a ni. Vâna indonaah chuan Setana leh a hote chu hneh an ni a, vân ata paihthlak niin, vânah chuan awmna rêng rêng an nei ve ta lo. Leiah paihthlak an nih vângin Diabawla leh  thlarau sual, ramhuai hote chu he khawvêlah hian theih tawp chhuahin an che mêk a nih hi.

  Mikaela leh a hote hian hnehna an chhan hi an tam zâwk vâng ni lovin, Berâmno thisen a vâng leh an hriattîrna thu avângte, thih ngam khawpa an beih vâng a ni tih kan hmu a ni (Thupuan 12:11). Kan chhinchhiah tûr chu Berâmno thisen hnehna atâna hmangtute hian thih ngam khawpin an nunna an ngainep tih hi a ni. Lal Isua'n "tupawh a nun humhim duh a piangin a chan ang a, a nun chan a piangin a humhim ang" a ti a. Chuvângin sual Setana hnehna atân hian mahni nun humhim tuma Lalpa hming lam hian awmzia a nei lo tih a lang reng mai, nun chan ngamna hi Pathiana nun humhimna a ni tih kan hriat a pawimawh hle mai. Thia kan in hlan hun a piangah nungin a inpuang zêl dâwn si a.

    Dragon leh a tirhkohte chu leiah paihthlak an nih hnu chuan Setana chu Pathian chungah a thinur em em a, vânah an tân hmun a awm tawh hek lo. Chuvângin, Pathian chi thlah, Pathian arsi, a thupekte zâwma Isua hriattîrna thu pawmtute chu do tûrin a kal ta a ni (Thupuan 12:17)

  Hla phuahtu chuan 'Indona zawnga rapthlak ber ka nun hi, vân indona aia nasa zâwk a ni' tiin a phuah hial a nih hi! Chu indona chu nangmahah ṭan a lo ni ta, nangmahah khân Pathian leh Setana chu i duh zâwng hmangin an indo ta a ni. Tisa duh zâwng thihsan ngamna, thihsan phal khawpa ngainep tuten Lal Isua thisena tlanna vângin hnehna an chang ang. Vân indona rapthlak tak chu i nunah tunah khân sawnin a awm mêk a, Lalpa thisena hnehna i chan theih nân i lam hawiin ban a phar reng e, tu lamah nge i ṭan dâwn le. Berâmno thisena tlan tawh i ni a, tupawh Lal Isua ring apiangte tân chhandamna kawng hawnin a awm a ni. Mi dawihte tân Vânramah hmun a awm lo! Lal Isuaa innghat ngamte tân huaisenna thlarau pek kan ni. Thlarau Thianghlim hnathawh hlauhna thlarau ni lo, huaisenna thlarau ngei chu' A hming ringtute' tân pekin kan awm a ni.

    Thihna hi nunna kailawn a ni a, thihna tel lovin nunna a chan theih loh a ni. 'Nitin ama Kraws puin mi zui rawh se' titu hian nitin kan nuna tisa thiltihte kan tih thih hi a va duh teh reng em. Chu chu sual hnehna a ni si a.

    Lalpa'n malsawm rawh se.

MIHRING HI PATHIANIN THLARAU NEIIN MIN SIAMA, CHU KAN THLARAU CHU CHATUANA NUNG TUR A NI.

Mihring siam dân:-

      Pathianin mihring min siam dân hi kan Bible-ah hian hmun hrang hrangah hmuh tur a awm a, fiah tha tak leh mawlmang tak a sawina hi han tarlang ila. 

   Genesis 1:26-27 Tin, Pathianin, “Kan anpuiin, keimahni ang takin mihring siam ila, anni chu tuifinriata sangha chungah te, chungleng sava chungah te, ran chungah te, lei chung zawng zawngah te, rannung leia bawkvâka kal zawng zawng chungah te thu i neihtîr ang u,” a ti a. Tichuan Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni. 

  Mihring chu Pathian anpui ngeia siam kan ni ziate, thil siam dangte chunga thu nei tûra siam kan nih dân te chiang takin a rawn ziak a ni. 

     Hetah hian Pathian hian mihring siam duhna a nei a, tichuan mihring chu mipa leh hmeichhiaah siam an ni tih a rawn ziah chhunzawm nghal a ni. Hei hi thua Pathianin mihring min siam dan a ni a, chuvangin mihring chu leia a siam hma khân Pathianah chuan din fel vêk kan nih zia a chiang êm êm a ni. 

     Genesis 2:7 Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a: tichuan mihring chu mi nung a lo ni ta a.

   Genesis 5:1-2 Hei hi Adama thlahte chuanna lehkha bu chu a ni. Pathianin thu ngawta mihring a siam nî khân Pathian anpuiin amah chu a siam a; thu ngawtin mipa leh hmeichhiaah anmahni chu a siam a ni; thu ngawta siama an awm nî khân mal a sâwmsak a, an hmingah chuan “Mihring” a vuah a. 

       Hetah hian thu ngawtin a rawn tia, thu ngawta a siam mipa leh hmeichhia kha mal a sâwm a, an hmingah mihring a vuah a tih leh leia vaivut lain mihring a siam a, a hnârah chuan nunna thaw chu a thaw lut a tih hi a in tiat reng a ni. Sawi danglam vak kan tum ṭhîn hian min tibuai fo ṭhîn a ni. 

  Pathianin mihring hi chi dang dangin min siam lo, a mihring siam hmasak ber chu Adama a ni a, a nakruh atangin hmeichhia a siam leh mai a ni. Genesis 3:20 Tin, Adama chuan a nupui chu mi nung zawng zawng nu a nih avângin a hmingah Evi a vuah a. 

   Pathianin mihring min siam dân Joba lehkha buah hetiang hian kan hmu leh a ni.

    Joba 33:4 Pathian thlarau chuan mi siam a, Engkimtitheia thaw chuan nunna mi pe.

    Mihring chu Pathianin leia vaivut hmangin rûangam a siam a, chu taksa rûangam hnârah chuan nunna thaw chu a thaw lut a, tichuan taksa rûangam mai ni tawh lovin a rawn nun takah chuan mi nung mihring a lo ni ta a ni.

    Hei hi Pathianin mihring min siam dân Bible-in min zirtir a tum chu a ni. Bible-ah hian mihring min siam dan ziah lanna a awm nual a, mahse, tuna kan han tar lan hi a fiah felfai ber leh mimawl ber pawhina a hriatthiam dân awlsam ber a ni. Pathian thu hi mi pakhat chauh hriat bik tûra tih a ni tawh lo. Thuthlung tharah hi chuan mi zawng zawng tân a ni tawh a, harsa taka min zirtir hi a tum a ni lo. 

Mihring hian Thlarau kan nei:- 

Mihring hian thlarau kan nei a ni. Chu thlarau kan neih chu mihringte nunna a ni bawk. Tin, mihringa thlarau awm chuan thil min hriatthiam tir thin a ni. Chu kan thlarau chu Pathian thaw kha a ni. 

    Job 33:4 Pathian thlarau chuan mi siam a, Engkimtitheia thaw chuan nunna mi pe.

    Job 32:8 Mahse, mi thil hriat thiamtirtu chu Mihringa thlarau awm, Engkimtitheia thaw chu a ni.

       Mihring chu thlarau nei kan ni tih hi a tichiang êm êm a ni. Thlarau hi awm ta lo se, mitthi kan ni ang. Thlarau awm lo chuan hriatna taksaah engmah a awm lo, thlarau tel lo chuan taksa chu rûang mai a ni a, ṭawiral mai tûr a ni.
 Johan  6:63 Tinungtu chu thlarau a ni, tisa chu engmahah a tlaktlai lo; in hnena thu ka sawite hi thlarau a ni, nunna pawh a ni.
Genesis 25:8 Tin, Abrahama chuan a thlarau a thlah a, lua kelsam to vek, putar tak, tar kuna damin a thi a, chipuite hnênah chuan hruaiin a awm ve ta a.
     Hetiang hian thlarau kan thlah tawh chuan thi kan ni mai.  Hei lo pawh hi Bible-a mi hi sawi tur tam tak a awm a ni.
         Chuvângin mihring hian thlarau kan nei a ni. Chu kan thlarau chu mihring hnâra Pathianin nunna thaw a thawk luh kha a ni.

Kan thlarau chu chatuana nung tur a ni:-

     Kan thlarau Pathian thaw nun nâna kan hman hi chatuana awm reng tûr a ni. Chu kan thlarau chu Pathian chauh lo chuan an tihlum thei lo a ni.
      Mathaia 10:28 "Tin, taksa tihluma thlarau tihlum thei lotute chu hlau suh ula; Gehena-a thlarau leh taksa tiboral theitu erawh chu hlau zawk ang che u.
              A chiang khawp mai, Pathian chauh hian kan thlarau a tihlum thei a, Setana leh a tirhkohten an tihlum thei lo a ni. Ka thlarau chu kan taksa dam chhûng ngei hian Isua Kristaah a pianthar a ngai a, kan taksa a thih tawhah chuan kan thlarau chu a ni dân tûr ang angin a awm tawh dâwn a ni.
         Krista Isuaa kan thlarau a piangthar loh chuan hremin a awm ang a, Kristaa a piangthar a ni chuan Abrahama ang chhûngah a châwl ang.
Luka 16:19-25 "Tin, mi hausa tu emaw a awm, puan sen duk leh puan zai sin tak a sin a, ni tin nuamsa takin a awm thin; tin, a hming Lazara kutdawh pakhat pan bawm khah luk, a kawngkhar bulah an muttir thin a, mi hausa dawhkana ei nawi tla chu ei a duh a; uite lah chuan a pante an lo liahsak thin a. Tin, heti hi a ni a, kutdawh chu a thi a, vantirhkohten an kalpui a, Abrahama angchhungah an dah a. Mi hausa pawh chu a thi a, phumin a awm ta a. Tin, mitthi khuaah chuan na tak tuar reng rengin a awm a, a han vanvadak a, hla taka Abrahama a angchhunga Lazara awm nen a hmu ta a. Tin, a au va, ‘Ka pa Abraham, mi khawngaih la, Lazara kha han tir rawh, a kut zung hmawr tuiah chiah sela, ka lei tihdaihna turin; he mei alhah hian ka na em em a ni,’ a ti a. "Nimahsela Abrahaman, ‘Ka fapa, nangin i dam lai khan thil tha i chang a, chutiang bawkin Lazaran thil tha lo a chan kha hre ta che; nimahsela tunah ani zawng hetah thlamuang takin a awm a, nang zawng i na a nih kha.
      He thu Isuan a sawiah hian a chiang hle a ni. Kan thlarau chu a chatuan nun nei a nih avângin hrem a nih pawn chatuana hrem a ni mai. Chatuana Pa ângchhûnga mi chu hlimna dik, thlamuanna tluantling leh innghahna dik a chang ang a. Rorêl nîah a thiam channa Kristaah chuan a chawl hlen tawh ang.
   

RINAWMNA

       Mihring chuan Pathianah a lo rinâwm tawh lo va, Pathianah rinâwm tûrin theihna a nei tawh lo tih hi ka han sawi hmasa duh a ni. A chhan chu mihring chu suala a lo tluk takah chuan Pathianah chanvo a nei tawh rêng rêng lo a ni. 

       Rinâwmna han tih hian sawi tûr tam tak a awm e, kan hmangaihte bula rinâwmna te, ṭhiante chunga kan rinâwmna te, kan hnathawhna kawnga rinâwmna te sawi tûr a awm teuh ang.

       Rinâwmna hi a pawimawhin, mi rinâwm chu khawi hmunah pawh awm nise retheiin a awm ngai lo. Mi rin a kai a, khawiah pawh a hmuingil ṭhin. Nun hlim takin a hmang thin a, nupa inkarah pawh inrin tawnna a hring chhuak a, ṭhian inkarah te rinâwmna chuan boruak tha a hring chhuak ṭhin.

     Rinâwm lo chu khawiah pawh awm se, mi rin a hlawh ngai lo va, rethei takin hun a hmang ṭhin a ni. Mi rinâwm lo chuan mi pawi a khawi ṭhin a, mualphona leh zahna a tawk fo thin a ni. Mite duhsak a hlawh ngai lo va, rêl leh sawi chhiat bâk a hlawh lo a ni.

      Awle, rinâwmna chu a pawimawh khawp mai. Rinâwmna hi kan mihring puite hnênah hian lan chhuah tirin keimahni ngei pawh hian he rinâwmna hi kan nunah bet tlat rawh se.

   Ka han sawi tum lai tak chu mihring hian rinawmna kan nei ve hi tha viau angin lang mahse, Pathianah chuan awmzia a awm lo a ni. Mihring rinâwmna chuan thiam min chantirtu leh in nghahna tlak a ni lo. 

      Chuvangin rinâwmna dik leh in nghahna dik chu Lal Isuan a nun min pek hi a ni. Chu nun neitu chuan a langah pawh a lang loah pawh rinâwm nun Krista chu a hmang ṭhin. 

        Rinâwmna nun nei lo mihring hnênah rinâwmna Krista nun chuan min rawn thlen chilh zawk a ni.

PPH TAHAN CENTRE THLALAK 2018

Mi â kan ti leh rilru lama harsatna nei hi eng emaw zat kan nei tawh a, hmeichhia 12 leh mipa hi 25 tunah hi kan awm mek a ni. Tahan Centre Pangpar huanah hian mi 37 kan awm a ni. A thawktute nen.

Kan centre rawn tlawh Ex. Cm of Mizoram.

Fri. 23rd March, 2018 khan Pu. Zoramthangan kan centre (Tahan Centre) min rawn tlawh a, a ni hi Tahan Chapchar Kut rawn hmanpuia rawn kal a ni. A hun chep tak karah kan centre min rawn ngai pawimawh hi kan lawm hle a ni.